गृहणी महिला सशक्तिकरण तालिमको समापन समारोह

सामाजिक विकास मन्त्रालय, बागमती प्रदेश र कागेश्वरी मनोहरा नगरपालिका, थली, काठमाडौँको आर्थिक सहयोगमा सम्पन्न गृहणी महिला सशक्तिकरण तालिमको समापन समारोह

सामाजिक रूपान्तरण, लैङ्गिक समानता र महिला सशक्तिकरणको दिशामा एक उल्लेखनीय कदमस्वरूप, सामाजिक विकास मन्त्रालय बागमती प्रदेश र कागेश्वरी मनोहरा नगरपालिका, थली, काठमाडौँको संयुक्त आर्थिक सहयोगमा नेपाल उपभोक्ता महिला तथा बालबालिका संरक्षण समूहद्वारा आयोजित एक विशेष तालिम कार्यक्रम सफलतापूर्वक सम्पन्न भएको छ।

कार्यक्रमको मुख्य उद्देश्य गृहणी महिलालाई व्यवसायिक सीपद्वारा सशक्त बनाउने, स्वरोजगारको बाटो खोल्ने, र उनीहरूलाई आत्मनिर्भर बनाउने रहेको थियो। तालिमको समापन समारोहमा सामाजिक विकास मन्त्री माननीय हरिप्रभा खड्गी श्रेष्ठज्यू प्रमुख अतिथिको रूपमा उपस्थित हुनु भएको थियो। उहाँको प्रेरणादायी भनाइ र समर्थनले सहभागी महिलाहरूमा थप उत्साह र आत्मविश्वास थपिएको महसुस गरिएको थियो।

उक्त ५० दिने तालिम, जसले ३५० घण्टाको समयावधिमा व्यवसायिक सीप सिकाउने कार्यक्रम संचालन गर्‍यो, दुई फरक तर एक-अर्कासँग सम्बन्धित सीपहरूमा केन्द्रित थियो। पहिलो, "मखमल जुत्ता, चप्पल र बेहुली ब्याग बनाउने" सीप, जसले महिलाहरूलाई हस्तकला र उत्पादनमूलक कामतर्फ आकर्षित गर्‍यो। दोस्रो, "व्युटिसियन एडभान्स तालिम", जसअन्तर्गत मेकअप, नेल आर्ट र मेहेन्दी जस्ता सेवामूलक सीपहरू सिकाइयो, जुन आजको समयको मागअनुसार रोजगार तथा व्यवसायमा ठुलो अवसर प्रदान गर्ने क्षेत्र हो।

यस तालिममा सहभागी महिलाहरूले व्यवहारिक रूपमा प्रत्यक्ष अभ्यास गर्दै आत्मनिर्भर बन्ने, घरमै बसेर सानो व्यवसाय सञ्चालन गर्न सक्ने, ग्राहक सेवा दिन सक्ने र सीप बेच्न सक्ने योग्यताको विकास गरेका छन्। उनीहरू अब सिपालु गृहणी मात्र नभई सक्षम उद्यमीका रूपमा पनि अगाडि बढ्न तयार छन्।

कार्यक्रमको अर्को महत्वपूर्ण पक्ष भनेको महिलाहरूमा लुकेको क्षमता उजागर गर्नु र त्यसलाई प्रयोगमा ल्याउन उत्प्रेरित गर्नु थियो। धेरैजसो महिलाहरूले तालिमलाई आफ्नो जीवनको मोडको रूपमा लिएका छन् र भविष्यमै यस्ता कार्यक्रम फेरि पनि सहभागी हुन चाहेको प्रतिक्रिया दिएका छन्। महिलाहरूको नेतृत्व विकास, आर्थिक स्वावलम्बन र सामाजिक सम्मान वृद्धि गर्न यस्ता तालिम कार्यक्रमहरू अत्यन्त प्रभावकारी हुने देखिएको छ।

समापन समारोहमा सहभागी महिलाहरूले आफ्नो अनुभव साझा गर्दा, धेरैले तालिमपछि आत्मबल बढेको, आर्थिक रूपमा केही गर्नसक्ने आत्मविश्वास आएको र समाजमा आफैंले केही गर्न सकिन्छ भन्ने सन्देश दिन सफल भएको जनाए। धेरै सहभागीहरूले आफ्नो समुदायमा पनि यस्ता तालिमहरू सञ्चालन गरिनु पर्ने माग समेत राखेका छन्।

अन्ततः, यस्तो प्रकारको कार्यक्रमले केवल केही व्यक्तिको जीवनमा मात्र परिवर्तन ल्याउने होइन, यो समग्र समाजको सोच परिवर्तन गर्ने, महिलालाई आत्मनिर्भर बनाउने, स्थानीय उत्पादन र सीपमा आधारित रोजगारी सिर्जना गर्ने, र समुदायमा आर्थिक विकासको गति दिने दीर्घकालीन प्रभावपार्दछ। कागेश्वरी मनोहरा नगरपालिका र सामाजिक विकास मन्त्रालयले मिलेर अघि सारेको यस्तो सहकार्यले अब थप धेरै महिलाहरूको जीवनमा नयाँ सम्भावनाको ढोका खोल्ने आशा गरिएको छ।